Sporti shqiptar ka një histori te gjatë dhe të lavdishme. Megjithëse një vend i vogël, Shqipëria dhe shqiptarët dallohen për dashurinë dhe pasionin e madh për sportin. Në Shqipëri praktikohen të gjitha sportet, gjë që favorizohët edhe nga kushtet klimaterike e ambjentale të Vendit. Shqipëria ka një popullsi shumë të re. Afërsisht 30% e popullsisë është nën moshën 20 vjeç, që do të thotë se ndër 3,5 milion shqiptarë gati 1 milion janë të rinjë e si të tillë, shumë të lidhur me sportin.
Vitet e vështira të tranzicionit nga një shoqëri totalitariste në një shoqëri demokratike, kanë patur nje ndikim kompleks mbi sportin në Shqipëri. Nga njëra anë u krijuan mundësitë për një zhvillim të natyrshëm e intensiv të sportit në kuadrin e demokratizimit intensiv të shoqërisë, por nga ana tjeter problemet e gjithanëshme që duhen përballuar në këtë proçes transformimi rrënjësor kanë provokuar një rënje të rëndësisë së sportit për shoqërinë dhe Shtetin. Si kompensim kemi një përfshirje shume më masive të iniciativës private në sport dhe ndikimi pozitiv i kësaj përfshirjeje është tashmë një realitet i prekshëm.
Shqiptarët konsiderojnë si sportin më të dashur futbollin, i ndjekur nga sportet luftarake e me rradhe gjithë të tjerat. Futbolli mbledh interesimin më të madh të publikut, mediave e biznesit. Shqipëria ka bërë një progres të rëndësishëm në këtë sport, dhe nëse më parë merrte pjesë formalisht në kompeticionet europiane e botërore tani kjo pjesmarrje është kthyer në një qëllim përcaktues. Përveç futbollit ndiqen basketbolli e volejbolli, disiplina në të cilat klube të ndryshme shqiptare kanë arritur rezultate të shkëlqyera: kryesisht në volejboll, shpesh klube shqiptare janë klasifikuar ndër katër klubet më të mira në Europë.